zuraizniazi

[zuraizniazi]

کشمیر

Chal para hun choray Neelum ki thandi chaon ko. Sitaron ki chat, haray bistar ki rahat aur mehki hawa ki yadain liyai kahan jaon ga. Woh kachay pul aur lakri ki sihri kaise charhon ga. Kaise par keron ga woh thandi behti nadiyon ko. Kaise sakon unn raaton ki khamoshi ka paon ga. Thanday chasmon k pani ki shifa main jab na paon ga tou kaise unn khubsorat kaliyon ki yadon ko bhulaon ga. Woh jo nanhi bachi mujhai aik anmol har  de gaye thi Sharda ki Wadi mein woh main kis dewi par sajaon ga aur woh jo sharafat uski ankhon mein thi woh main kaise apne zehan se mitaon ga.

Woh jo Kel k chotay bacho nay hath thamay gumaya tha mujhai apna kashmir, unse mili apnahat main kahin aur kaise paon ga. Woh beech rah mein milli aik methi chai ki pilali aur maslay walay pakoray haye mein kaise bol jaon ga. Yaron ki suni sunae kahaniyan aur raat k andheray mein sitaron si timtimati wadaiyan her roz unki yadd mein dil ko jalaon ga. Iss par kharay Hindustan ki nagri mein jo aik ashiyana dekha haye main uss dori ko phirse kaise mitaon ga.

Bohat yadd ai gi Kashmir ki her wadi mujhai, heray paton par likhi sunahri oss se her kahani mujhai, unn chotiyon par likhay suraj ki kirano se afsanay mujhai, unn lehron mein pani se behtay naghmein puranay mujhai. Kaise mein abb dilko sakoon dilaon ga, haye kaise mein ye sub bhol paon ga. Zuraiz 

#Kashmir Urdu Poetry Freestyle

[zuraizniazi]

قسم

Roshan sitaron ki basti mein behnay wali dhemi si chandni ki kasam khaye betha hun, Amawas ki shab mein aik dobti kiran ki kasam khaye betha hun. Dil lagi aik sangeen khel hai jazbaat mein dobay ashiq dewano ka, Mein jahil apne shok mein kisi se anay walay kal ki kasam khaye betha hun.Ghalib hotay hein woh jo mehboob k darbar mein malang banay bethain, Mein tou unke dar par aik dastak k badd hi wapsi ka rasta napon. Apni khudi ko pagalpan ki terhan sar par charhaye betha hun, Phir kya mazboot hein rishtay mein jinki kasam khaye betha hun.Sachay hotay hein woh jo aik jhalak ki khatir gehri nadi ko matti pe par ker jayien, Mein tou halki barish ko bhi judae ka bahana banaon. Bohat nainsaf hun jo unko rolaye betha hun Phir kya perwah unki k jhotay alfaz ki kasam khaye betha hun.Khaza ki thandi fizah mein aik khilti kali ki kasam khaye betha hun, Iss phiki shakhseyat se unki mithi muskurahat ki kasam khaye betha hun. Dil lagi aik sangeen khel hai jazbaat mein dobay ashiq dewano ka, Mein jahil apne shok mein kisi se anay walay kal ki kasam khaye betha hun.                                                                                                                                              Zuraiz Niazi

#kasam #urdu #poetry #freestyle

[zuraizniazi]

دستک

Parveen k mian, Arshad, ki wafat ko abb teen saal beet chukay thay. Ulaad thi nahi, bhabiyon se banti nahi thi aur saas nay bichari ko mian ki wafat ka ilzaam de ker uss se sub natay khatam ker diyai thay. Bichari Sultanpark k aik chotay se makan mein akeli rehti thi. Bhai kabhi ghairat kha ker kuch paise bhej daitay thay warna Arshad ki sarkari nokri ki waja se milne wali thori si pension se bhi ghar acha hi chal jata tha. Kuch kerne ko hota nahi tha tou pura din Quran aur Kitabon mein gum rehti thi. Sehat berkarar thi tou roz ki dou roti aur chai pani par zindigi achi guzar rahi thi. Bus kabhi kabhi akelay honay k gham mein  thoray anso gira laiti thi.

Asar ka waqt tha, Parveen nay abhi abhi namaaz parhi thi. Chai peenay ka dil tha tou chulay par pani charha diya. Thora pani ziyada rakh diya tha tou khudko kosnay lagi. Abhi khudko dou lafz bolay hi thay k achanak ghar k darwazay par aik dastak hoye. Kaan thoray kamzor thay tou Parveen ko laga shaid uska waham hoga. Bhala uss bichari se kon milne ai ga, Eid tou thi nahi k koe rishtedar a jatay tou thori dair roki, socha, aur phirse kaam mein wapis lag gaye. Itne mein dobara se dastaq hoye. Parveen thori paraishan ho gaye k bhala iss waqt kon ai ga. Na uski mohalay walon se banti thi aur na uske rishtedar usse itna pasand kerte thay. Usse laga ya tou koe kuch mangnay ayya hoga ya phir wohi puranay survey kerne walay honge.

Hairat mein thi k jo bhi ayya hai bohat piyar se dastak daita hai, warna jo bhi uske darwazay par atta tha darwazay ko itna zor se bajata tha k kafi baar tou darwaza bus girtay girtay hi bacha. Parveen nay chohlay ki agg kam ki, apni chadar ori aur darwazay ki terf chal pari. Ghar chota hi tha aur kitchen se darwaza kuch kadam hi dur tha. Darwazay k kareeb ponchi tou teesri dastaq hoye, Parveen nay jaldi mein darwazay ki kundi kholi aur darwazay ki khirki kholtay hi hairan ho gaye. Phlay thora gabra gaye, phir muskuraye, phir socha salaam keray par phir shaid narazgi mein mor gaye. Darwazay k uss par Parveen ka chota bhai Asghar khara tha. Usne safaid kurta pehna tha aur uske chehray par sharmindigi aur muskurahat dono thi. Bari behan k mortay hi Asghar nay fauran Salaam kiya.

Parveen teen bhaiyon ki subse bari behan thi. Bhai acha khasa kama laitay thay. Parveen k sunay mein ayya tha k unhon nay koe karobaar bhi shuru kiya tha aur abb tou shaid subke pass apni apni motorcar bhi thi. Bari hairan thi k najanay itni masroof zindigi mein uske bhai ko uski  yadd achanak kaise a gaye. Parveen nay apne khiyalon ko samaita aur salam ka jawab de diya. Wapis mor ker aik baar phir se bhai ki shakal dekhi aur usse ankhon k isharay se ghar k andr bola liya. Parveen nay darwaza band kerne se phlay ghar k bahir jhanka k kahin koe aur tou nahi ayya. Gali mein koe nahi tha, mayusi mein darwaza band kiya aur Asghar se pocha, “Ajj behan ki yadd a gaye? Biwi se larr k ai ho kya?” Asghar besharmo ki terhan muskuraya, “Bus baji, zindigi najanay kahan le gaye, apno se paraya ker diya hai”. “Apno nay paraya kiya hai ya tumhari biwi nay?”, Parveen nay Asghar ko bethnay ka ishara kertay howay kaha. Asghar k pass iss baat ka koe jawab na tha tou chup ker k charpaye par betha aur zameen ki terf dekhne laga. Parveen k ghar mein aik hi kamra tha. Uss kamre mein dou charpayan thi, aik par Asghar betha tha aur aik par Parveen. Dono khamosh thay aur bus kamre mein chohlay par bannay wali chai ki hi awaaz hi sunaye deti thi. “Paraishan ho kya?”, Parveen nay bhai k chehray ki hawaiyan dekhte howay kaha. “Paraishan? Ji shaid bohat sharminda hun apni ghaltiyon par”, Asghar nay apni behan se ankhain milatay howay kaha, “Baji yadd hai abhi kal ki baat lagti hai, mein bacha tou tha, app mujhai kapre badwalaya kerti thi, aur jab Abu atay thay tou app mujhai unse nimko k liyai paise mangne ka bolti thi”. Asghar thori dair ruka, muskuraya aur phirse bolne laga, “kaise baray ho gaye hum? Kaise bhol gaye woh sub purani bataien? Abu aur Ammi kya sochte honge? Bohat ghalat kiya hai baji… bohat”, Asghar ki ankhon se anso girnay lagay. Parveen paraishan thi, na janay uske bhai ko achanak se kya ho gia tha. Parveen nay tou hamaisha sub dil mein rakha tha, kabhi koe gila bhi nahi kiya tha. Parveen ko laga shaid chota hai, kisi se laraye ho gaye hogi, shaid baray bhaiyon nay kuch bol diya hoga. “Pagal ho kya? Ro kyun rahay ho? Mujhse nahi dekha jaye ga aise… Larr k ai ho kya?” Parveen nay ghusay mein bola.

Asghar nay apni ankhain ponchi, Parveen nay Asghar ko sath rakhay pani k jug ki terf ishara kiya par asghar nay sir hila k inkar ker diya. Chai ban chuki thi, Parveen nay aik cup mein chai daali aur Asghar k sath pari maiz par rakh di. Kuch lamhay aise hi khamoshi mein guzray, phir Asghar nay aik lambi sans li aur behan ki terf dekha, “App Ammi ki jaga hein, Mein ghallat tha mujhai maaf ker dein”. Asghar ki ghamgheen lehjay ko sun k Parveen ka dil bhi bhar ayya. Ankhain nam hoye par himat wali aurat thi khudko ronay se roka, “Asghar agr tum maafi mangte ho tou tumhain maaf kerti hun par mein shaid kabhi tumse naraz thi hi nahi. Bus zindigi aur kismet nay sath nahi diya. Meri duaien hamaisha tumharay sath rahi hein, mein nay kabhi ghussay mein bhi tumhain baddua nahi di. Han roye hun, akelay mein, tumhari yadd mein, kya keron insaan hon na, rona tou a hi jata hai”. Ispr Asghar ki ankhon se anso phirse phot paray, charpaye se khara howa aur zameen par beth gia, “Baji mujhai maaf ker dein, mein sharminda hun, mein kya moh dekhaon ga, baji mujhai maaf ker dou”, Asghar k chehra abb anson se gila ho chukka tha. Manzar dekha tou Parveen bhi khudko rok na saki, anso ankhon se nikalay aur galon se neechay utar hi ai. Dono behan bhai uss khamoshi mein thori dair rotay rahay, narzain zameen par thi aur us chotay se kamre mein bus siskiyon ki awaaz ati rahi. Phir achanak se Asghar khara howa, “Zarori kaam hai baji, agr guzar sakta tou sari zindigi apke angan mein beth k guzar daita par mujhai chota smjh k maaf ker daina”. Ye bola aur behan ka jawab sunay beghair hi kamre se taizi se bahir nikal gia. Parveen nay ghar ka darwaza kholnay ki awaaz suni par woh band na howa. Paraishan thi, k ye najanay uske sath kya howa tha. Na janay kyun Asghar khudhi ayya aur khudi challa hi gia, Parveen ki smjh se bahir tha. Usse hairat bhi ho rahi thi, rona bhi a raha tha aur ghussa bhi charh raha tha. Ye bhala koe maafi mangne ka tareeka tha? Parveen kamre k dosre terf paray garam chai k cup se nikaltay dhowaien ko khamoshi mein dekhti rahi. Bachpan ki yadain aur maa baap ki bataien usse ghamgeen kiyai ja rahay thi. Usne apne dard ko kam kerne k liyai ankhain band ker lein. Khamoshi aur andheray mein aik sakoon sa tha. “Parveen tum ho?” Parveen nay ghabra k ankhain kholien, koe aurat thi. Aik anjaan aurat ko apne ghar k andr khara dekh ker Parveen ghusay mein boli “Behan app kon ho? Ghar k andr kaise ai?” “Mujhai maaf kerain, darwaza khula tha tou mein khud andr a gaye. Tum Parveen hi hein na?” Anjaan aurat nay dhemay lehjay mein kaha

“Han mein hi Parveen hun par app kon hein?” Parveen ghussa thi “ Mein tumharay bhai Nouman ki biwi ki dost hun. Isi Mohalay mein rehti hun. Tumhain aik kabar dainay ai hun”, Aurat nay kaha.

“Kya khabar? Khairiyat tou hai” Parveen phlay hi pareshan thi aur abb hairan bhi ho gaye. Aurat thora ruki par phir dar k boli,“Tumharay subse chotay bhai ki kal wafat ho gaye hai, ajj janaza tha apne miyan ko liyai wohi se a rahi hun. Kisi car accident mein wafat hoye hai.”  

Parveen ye sun ker hairan hoye, phir hasi par na janay kyun uski ankhon se anso behna ruk na sakay…

#short story #dastak #urdu #suspense

[zuraizniazi]

ناٹک

Jab chaye gi khamoshi raaton ki tanhai mein, Jab bethain ge thak har ke subse judai mein,

Yadd tou phir ai gi, Puranay kissay kholay gi, thora tou tarpaye gi.

Aik dil behlati perchae thi, Han yaron k sang bitae thi Baar baar tumhain batlaye gi, Na umeed tumhain keraye gi, Yadd tou phir ai gi, thora tou tarpaye gi.

Char lamho ka natak tha, Ghallat tumhain behkaye gi,

Kabhi kisi khubsorat shab ki yadd mein dobaye gi, Kabhi kisi se judaye ka afsos tumhain dilaye gi Han yadd tou phir ai gi, Bohat baar anso giraye gi, thora tou tarpaye gi.

Rawan zindigi ki rokon mein, Achanak kuch sabak tumhain sikaye gi.

Kitabon k gheray lazfon mein, Sub pahailiyan phir wohi suljaye gi. Yadd tou phir ai gi, Her ishq ki talab hai, lazim hai, thora tou tarpaye gi Yadd tou phir ai gi… -Zuraiz Niazi

#poerty #natak #urdu

[zuraizniazi]

خدا

Bohat socha k phir likhon mein bhi khuda k naam, Keron wohi jurm jo kiya her shayer nay kholay aam.

Dareena safar main phir keron par, aur paon her wohi khayali makaam, Pohancho darbar-e-haq mein, aur phir her lafz ho bus Khuda k naam.

Lagay mefil wahan phir meri shairi ki bay-rook subha-o-shaam, Malaika dein salami, aur mukalmay khuda se hon bohat aam.

Makaam-e-khudi ho phir itna jalali, k ankhain band hon tou khuda ho, Fakiri itni muttaqi k baki martabay hi hon mujhpr haram.

Safar mera ye phir guzray dewanaypan pe teharti kashti mein, Behkay shura ka hun main kaptaan, aur meray hath mein ho ilm ka jaam.

Bohat socha k phir likhon mein bhi khuda k naam, per mehaz jali tajarba hai aisa khayali kalaam.

Kya maloom phir mujh ahmaq ko k mureed-e-khaliq kya, mein tou khoya hun dhondnay apne andr khudka hi makaam.

Mein tou hun phir aik muthi-bhar matti, katra-lahoo hai mera naam, Hai kya okat meri k ho mera khiyal bhi uss khuda k naam.

-          Zuraiz Niazi

#Khuda Poetry Urdu

[zuraizniazi]

پریتو

Woh jab gardan jhuka k nazrain uthati thi, khuda ki kasam, bohat dil ko bhati thi. Woh muskura k phir jab palkain jhapkati thi, seenay mein kuch aag lag jati thi. Woh siyah thi ankhain jo na tikti kisi pr. Jo usne kisi ko daikha, phir na daikha palat ker. Jab chalti thumak ker wairanay thay mittay. Jab rukti, palati, dewanay thay martay. Poray mohalay mein thi nazar uspr subki. Usse dekh k mulana ki bhi raal thi tapakti. Aise dekhte jaise woh hoor ho koe, zaror unki niyat mein fator tha koe. Auratain bhi uspr thi bataien banati, apne khawandon ko thi uspr nasihat dilatein. Phir bhi na sharmati, na darti, woh kisi ki na parwah kerti, bus sar ko utha k fakhar se hi chalti. Payal chanka k, kamar matka k, woh galiyon mein hal chal macha k, jab sham ko ghar wapis atti thi, logon ki kitarein bahir lag jati thien. Woh shor thay machatay, najaiz c awazain bhi lagatay. Usse ghumanay aur phiranay ki rishwat tak dilatay. Par woh na jhokti, na phisalti, na sunti kisi ki bus ankhain bacha k aur chara chuba k ek “meinn” c thi kerti.

- Zuraiz Niazi

#freestyle poetry #urdu #eid #Pareeto

[zuraizniazi]

کون

Ajj uss shamma ko dekhta hun tou smbhal nahi pata. Uski dhamak par mujh jugno ka naach ajj bhi roka nahi jata. Kyun jaal raha hun phirse ajj uski mohabat mein maalik, mujh jahil se tou her roz yun tarapna roka nahi jata.

Phir khudi mangi mein nay tujhse se maafi ki duaien, phir khudi apnay shauq mein dafnaien teray karam se milli sari razaien. Phir khudi roya apne kaamon ki ghalazat pe teray agay, phir khudi apni pakezgi par gunegaron se bhi ungliyan uthwaien. Aur khudi sochon k kon hun mein maalik, kabhi mein terra momin banda ban jaon tou kabhi kufr ka alam lehraon.

Merri sharafat ka daaman phirse kaise maila howa ajj, kya koe meray emaan mein milawat ker giya? Kyun ghabraon hath uthatay howay phirse mein ajj, kya merra aik gunnah humaray raabtay mein koe rokawat ker giya? Kahan bhagon iss kufr se jo saya hai merra, kis aangan mein dafnaon k apna hi kamaya hai ye sub merra. Kya kuch lamhon mein mein nay tujhai kho diya maalik, kyunke lagta hai jaise sadiyon se nomaya hai ye zakm merra.

- Zuraiz Niazi

#freestyle poetry #urdu #kon

[zuraizniazi]

یاد

Ye ajj muskuranay ki waja kya hai? Uski yadd mein kho Janay ki waja kya hai? Dil ko phirse wohi puranay geet sunanay ki waja kya hai? Mein tou ye dewanon se poch poch k thak gia k, ai meray ishq mein dobay mujrimon, ye khudko zabardasti sehlanay ki waja kya hai?

Nae Umeed le k aik rah par nikala tha, socha tha kuch kadam chal k bhool jaon ga usko. Socha tha aik nae dastan sunaon ga khudko. Socha tha dil k kisi konay mein dafna k ishq ko, maula ki rah mein lagaon ga khudko. Socha tha k kabhi giray iss rah par tou wapis uthanay walay bohat honge. Socha tha k kabhi ro diyai tou tasali dilanay walay bohat honge. Aray ye bhi socha tha, k agr kabhi zarorat pari tou wapis ishq mein dobanay walay bhi bohat honge.

Acha hai, ajj agr dil rota bhi hai tou sakon mein rota hai. Acha hai, agr dard hota bhi hai tou kahin door andr dil k aik ashiyanay mein hota hai. Acha hai, ajj gham chupa k muskura bhi laitay hein. Acha hai, abb tou khudko jhooti tasali dila bhi laitay hein.

Par ajj kuch ajeeb c barsaat ai hai. Iss khamoshi mein bhi aik ajeeb sa shor lae hai. Janay kyun, ye merri dushman ajj mujhai phirse wohin ghaseet lae hai. Rona hai. Hasna hai. Aray jhoomna hai aur soog bhi manana hai. Mujhai wapis door ja k phirse yehin anna hai. Usko bahon mein bharna hai aur wohi sakoon pana hai. Uski muskurahat par phirse din ko dobana hai. Uski yadon mein raat ko phirse uth jana hai. Mujhai abki baar usko ankhon mein bhar k, bahon mein kas k apne sath yahan lana hai. Apni khuwahishon ko paink k kahin door, abki baar usko bus piyar ka hi batana hai. Phirse wohi geet gana hai. Ajj phirse muskurana hai.

Ranjishon ko tor daita hai, khuwahishon ko mor daita hai, ye jo doob jaien kisi k piyar mein unka ishq, saray ilmon par unko aboor daita hai.

- Zuraiz Niazi

#freestyle #poetry #urdu #yaad