امبارح كنت بتكلم مع واحدة صاحبتي من ايام الجامعة واشتغلنا مع بعض بعد الجامعة فترة فا علاقتنا قويت اكتر، البنت دي مامتها وباباها متوفين من بعد تخرجها ربنا يرحمهم ويغفرلهم، واختها الكبيرة ربنا يهديها متضايقة انها قاعدة في البيت اللي سابه باباها وعايزة نصيبها منه ورافعة عليها قواضي عشان تطلعها منه وتبيعه مع ان البنت ملهاش مكان تاني تروحله وعايشة دلوقتي على معاش باباها ومامتها اللي هو بيكفي المعيشة وساعات بتعرف توفر منه وساعات لا، والكبيرة المفروض متجوزة وعندها بيت ومستقرة..
حكيت المقدمة دي عشان تعرفوا ظروفها وان نفسيتها دايماً مش مرتاحة بسبب ان كل شوية يكون فيه جلسات محاكم وللاسف برضه صحتها اتضررت، غير ان اقرب الناس ليها ضدها مش معاها.
بس تعرفوا الحد اللي عنده مشاكل الدنيا ولما تكلموه تلاقوه بيضحك وبيخطط عايز يعمل ايه في حياته وبيدور على فرص شغل وسفر وانبساط، وهقول لكم كمان حاجة عجيبة هي بتعملها كل سنة، بتحوش من بعد العيد الكبير للعيد الكبير اللي بعده عشان تجيب اضحية وتضحي وفعلاً نجحت في الموضوع ده كذا سنة برغم ان الاسعار بتغلى، مع انها في حاجة للفلوس بس بتقول لي انا بحس اني مبسوطة وبعمل دا عشان الثواب كمان يروح لماما وبابا ومش بحب افوت عيد حتى لو هشترك مع حد المهم اضحي، وبلاقيها دايماً بتساعد في الخير ولو معاها فلوس قدرت توفرها بتطلع صدقات، وبجد ربنا مبارك في رزقها ماشاءالله بتقول لي ساعات بقعد افكر انا ازاي هوفر الفلوس او ساعات بتزنق وبيطلعلي حجات مش عاملة حسابها وبعدين بلاقيها اتدبرت من عند ربنا، عندها ايمان وثقة في الله انه هينصرها وانه مش هيضيعها ابداً وامبارح قالتلي "انا واثقة اني هطلع من كل دا على خير باذن الله وهكلمك افرحك ان ربنا نصرني، لاني بقالي ٤ سنين من ساعة وفاتهم ربنا ساترها معايا وايامي بتمشي كويس، والحمدلله ربنا بيوقفلي ناس كتير في كل مكان بتسهل عليا وبتهون عليا وحدتي"
عارفها انها كتير بتتعب وكتير بتزعل، بس هي ربنا مديها قوة ماشاءالله في مواجهة حجات كتير بتتعرض ليها ولسة في قلبها مكان لفعل الخير برغم كل حاجة، لما بتكلم معاها بتكسف اني ساعات ببقا مخنوقة وزعلانة من غير سبب او لاسباب تافهة، واحدة زيها بتحمد ربنا كل يوم واحنا ساعات بننسى نحمد ربنا واحنا غرقانين في النعم ومش شايلين هم حجات كتير، وعندنا راحة بال ان محدش قريب بيعادينا او عايز لنا الضرر، ربنا يبارك لها بجد ويقويها ودايماً اشوفها مبسوطة وابسط الحجات بتسعدها.