This is a verified fundraiser for a Palestinian family from Gaza. The link to Amal’s Paypal is down below, and you can also find the project watermelon spreadsheet where their team vets fundraisers. This has been verified also by El-Shab-Hussein and Nabulsi. Thank you for your support!
قبل ما أبلش كتابة لازم أبدأ بنقطتين مهمتين؛ الأولى: أنا ترددت كتير أكتب هالبوست أو لأ، ولسه مترددة بصراحة وما بعتقد إني كتبت هون من قبل كلام موجّه لناس كوني بعتبر هاي مدونتي الشخصية، بس الكلام اللي رح قوله بيعنيلي كتير إنه يوصل لكل اللي بهتم لهم وبيهتمولي أو حتى كل الناس، بعرف إنه طويل كعادتي بس بتمنى من قلبي ينقرأ للأخير. الثانية: أنا بخير، ما عم بكتب وأنا عم ببكي، ماني منهارة ولا رح أموت عن قريب :D الليلة ضحكت من قلبي وغنيت ورقصت وكنت مغمورة بالحبّ والدفا والنشوة أكتر من أي وقت مضى، أنا بخير.
اليوم عيد ميلادي الـ٢٦، تشخصت بسرطان ثدي من الدرجة الثانية يوم ٨ مايو، عايشة وبتنفس وبغني "damn it it's so good to be alive".. لأني ممتنة إني عايشة.. وبحب حياتي.. حد الكره. فكرت شو أول شي ممكن أكتبه بسنتي الجديدة، ولازم أكتب شي إله معنى بما إنه عيد ميلادي، فهاد اللي طلع معي.
لو فيه شي واحد بس رح يضل يلاحقني طول حياتي من يوم ما تشخصت بالسرطان، هو اليوم اللي كنت فيه باليونان الشهر الماضي، هنيك اكتشفت بالصدفة التامة كتلة/lump بصدري، أول شي عملته لما رجعت على لندن إني أخدت موعد وفحصت، ولأنها التجربة الأولى بالنسبة إلي بفحص سرطان الثدي ما كنت بعرف شو ناطرني، اللي صار إنه الدكتورة عملتلي تحليل دم، فحصت المنطقة كاملة بالإيد، وسألت عن أعراض معينة وتاريخ العيلة، وبنفس ذات اليوم حكتلي إنه ورم ليفي ما بيتحول لشي تاني وما بيأثر. رجعت بيتي هداك اليوم مرتاحة ومتطمنة وببالي أعمل عملية عن قريب واستئصله طالما ما بيأثر، الكتلة ما كانت ظاهرة بس الفكرة إني رح أضل حاسة فيها، والسرطان trigger كبير بحياتي، فقررت أشيله لأرتاح.
بعد أسبوع كنت رايحة على المشفى لأحدد تاريخ العملية وأسمع شو لازم أتوقع أثناءها وبعدها، فالمفاجأة كانت إنه الفحوص اللي عملتها الدكتورة الأولانية ما كانوا كفاية لتحديد نوع الورم، وإني بحاجة لماموغرام وbiopsy لنتأكد، كل الراحة والطمأنينة انمسحوا عني وقتها وقضيت أسبوع كامل بتعامل مع أفكاري والـwhat if اللي ببالي، بالنهاية طلع سرطان ثدي منتشر في المنطقة كلّها، ورم طوله 12×1 سم، والمرحلة الجاية المتوقعة بحالتي إذا ما استجاب السرطان للعلاج الحالي إنه ينتشر لأعضاء تانية ويصير stage 4 أو secondary BC وهو نوع مختلف تمامًا وعلاجه مختلف وفرصه نجاته مختلفة.
ليش عم أحكي هاي القصة؟ مو لأني بحاجة لتوثيق/مشاركة شي بيخصني هالمرة، وإنما لخبركن عن شي حقير جدًا في الكانسر لاند اسمه الإحصائيات، هن اللي بيحددوا كل شي باختصار. الإحصائيات العامة بتقول إنه 5% من النساء بالعالم اللي بينصابوا بسرطان ثدي هم تحت سن الثلاثين، هاي الإحصائية هي اللي كانت السبب ليش دكتورة افترضت من عمري إنه الكتلة اللي عندي ورم ليفي مو سرطان.
34 شخص بيتشخصوا بسرطان ثدي كل يوم، كل 45 دقيقة فيه شخص بيموت من سرطان الثدي. هاي الإحصائيات في بريطانيا بس.
إذا سرطان الثدي تم تشخيصه وهو في مراحله الأولى، فرصة النجاة لخمس سنين جايين هي 9/10، وبتنزل لـ1/10 إذا كان في المرحلة الرابعة أو الـ BC secondary اللي حكيت عنه سابقًا. 2500 شخص من أصل 50 ألف شخص لما بيتشخصوا بسرطان الثدي بيكون في مرحلته الرابعة، معظم حالات سرطان الثدي بيتم اكتشافهم عن طريق الفحص الذاتي، نصف نساء العالم فقط بيعرفوا أجسامهم ورح يلاحظوا إذا صار عليه أي تغيير، ثلاث أرباع الناس اللي لاحظوا تغير في الثدي ما راحوا على الدكتور على افتراض إنهم رح يضيعوا وقتهم، أو من الإحراج، أو من الانشغال. ثلاث أرباع الناس واثقين إنهم ما رح ينصابوا بسرطان الثدي الآن أو بالمستقبل.
طيب، شو الأسباب الرئيسية اللي بتخلينا ما نعير الموضوع اهتمام، وما نتفقد أجسامنا؟
النسيان، إنه نحنا مشغولين وأحيانًِا بيكون صعب نلاقي وقت، لكن الحقيقة إنه إذا فيه عندنا وقت ناخد شاور، إذًا عندنا وقت لنفحص أجسامنا.
قبل ما أكمل الأسباب، fun fact:
أجسامنا بهالحالة (عندي سبب ليش بعمم) : الثدي!
لسه كتير صغير/ة (رح أبرر في النقطة اللي بعدها ليش حطيت ضميرين)، الحقيقة القاسية إنه حتى لو نحنا كتير عمرنا صغير لسه لننصاب بسرطان الثدي، خاصة إنه الخلايا السرطانية بتاخد سنين لتتطور.. بس أنا كمثال حي، إثبات إنه عندنا قابلية ننصاب فيه، وبدون ما يكون فيه تاريخ للعائلة معه كمان. ومن أيامي الأولى في المشفى وتجنبي لأي اختلاط ومع هيك، شفت بنتين واحدة عمرها 18 والثانية عمرها 23، الاتنين تشحصوا بسرطان ثدي من الدرجة الرابعة. فإذا عمرنا كبير بما يكفي لنعرف أجسامنا ونحس فيهم ومنعرف شو هو السرطان، إذًا هو كبير بما يكفي لننصاب فيه.
أنا رجل، ٤٠٠ رجل بيتشخصوا بسرطان الثدي كل سنة ببريطانيا، و٢٧٩٠ بكل العالم، و٥٠٠ بيموتوا منه كل سنة.
ما بعرف كيف، الحلو إنه ما فيه طريقة صحيحة أو خاطئة للفحص، بس افحصوا.. وافحصوا.. وارجعوا افحصوا. رح أحط صورة تحت + فيديو، عن شو ممكن تكون الأعراض التانية غير الكتلة، كل متى؟ كل شهر.. كل أسبوع.. مو مهم. المهم إنه نكون منعرف أجسامنا منيح ومنحسهم وما منحس بالإحراج، وإذا صار أي تغيير بنقدر نلاحظه بأسرع وقت.
مش موجود بالعيلة، الحقيقة إنه أقل من 10% من حالات سرطان الثدي هي جينية، هاد الاعتقاد بأنه السرطان بشكل عام وراثي.. وإنه أول شي بيعملوا الدكاترة إنهم بيسألوا إذا فيه أقارب مصابين فيه، بيخليني أنا شخصيًا ونحنا ما عندنا تاريخ معه بالعيلة، أسأل ليش أنا؟ لهيك مهم نعرف إنه ممكن يصير.. وممكن يصير لأي شخص مين ما كان.
ليش مهم بالنسبة إلي لهالدرجة؟ إذا حكيت إنه ممكن أنقذ حياة إنسانه (السبب البديهي اللي متوقع احكيه).. ما حدا رح يتذكر غير لشهر أو شهرين وبعدين مننشغل ومنرحع ننسى، سببي الأول والأكبر إنه سارة اللي تشخصت بسرطان، إله علاجات بس ما إله علاج نهائي، ولا ضمان إنه ما رح يرجعلي لو تم علاجه، وأنا عمري ٢٥ سنة.. مسحولة بنص دوامة الحياة.. أم لطفلة عمرها ٧ شهور.. وحاسة حالها بصحتها وشبابها وعندها أحلام وخطط وفجأة التشخيص غيّر كل المعادلة، بدها توصل للناس إنه الموضوع مو مجرد "توعيه صحية" و"إجراء روتيني" هو أكبر من هيك بكتير ولازم ناخده على محمل الجد بمجتمعاتنا، وما نستنى شهر التوعية بس لنحكي فيه. دقيقتين من وقتنا كل شهر والفحوصات خاصة لسرطان الثدي حتى لو إنها مو مريحة، مانها أهم من حياتنا.
السبب المهم التاني، إني بدي أكسر حاجز الإحراج والعيب وأحكي قديش جميل ومريح أحكي لكل مين بيسألني إني اكتشفت الكتلة بكير، بسبب حبي لجسمي، وإنه مو عيب ألمسه وأكتشفه، فحتى لو صار وحسيت بيوم من الأيام سابقًا إنه فحصي للثدي الشهري عبث وما له جدوى وضمنت إنه ما رح يجيلي، استمريت لأنه لما نحس ونلمس ونتطلع ونكتشف.. علاقتنا بأجسامنا بتتغير.. ومنبطل نقسى عليهم.
بالنسبة للأعراض (جدير بالذكر إنه سرطان الثدي دائمًا بتبلش أعراضه من الثدي، وممكن يصاحبه آلام/تغيرات في مناطق تانية، بحالتي كان ضهري مثلًا، بس دايمًا دايمًا بيبلش من الثدي) :
Please watch this, it's the most beautiful video I've ever seen about it. Breast cancer can affect any body!
أخيرًا وليس آخرٌا، ولأني مو حابة أترك العنوان بدون تفسير حتى لو البوست صار أطول مما تخيلت. فيه خوف بيتعاظم بسبب الحبّ.. وخوف تاني بيتبدد بسبب الحبّ، أنا إنسانة كتير بتحبّ جسمها، تقبلته بكل عيوبه وبرزتهم حتى صاروا ميزات وجمال.. اللي أدركته بسبب السرطان للآن إنه عندي حالة خوف من شو ممكن يصير بمنطقة خاصة وجمالية في جسمي، كتير موضوع صعب.. الشي اللي أول مرة رح أعترف فيه إنه باليوم اللي تناقشنا فيه بخيارات العلاج أنا والدكتور، كل الناس بتفكر إني اخترت الكيماوي والإشعاع بإرادتي، الحقيقة إنه الدكتور حكالي إنهم أكثر طرق فعالية وسرعة بحالتي وإذا ما اخترتهم رح يضطروا يلجأوا لاستئصال الثدي، لأنه الورم أكبر من إنه يستئصل بعملية عادية. بكتب اليوم لأفكك حالة الخجل اللي بتصيبني كل ما أحس بالخوف إني ممكن أستئصله، وحالة الخوف من إني رح افقد شعري، خاصة إني بشوف جسمي ملكيتي والخوف مو نابع من نظرة الشريك.. أو نظرة الناس.. وإنما نابع من أسئلة حوالين مدى تقبلي لتغيير واضح في شكلي الخارجي. كل الناس اللي حواليّ بترجح كفة الصحة على كفة الجمال، أنا الاتنين في نفس الكفة عندي، وماني "شجاعة" مثل أنجلينا جولي مثلًا اللي "قطعت العرق وسيّحت دمه" أول ما عرفت بوجود جين بجسمها بيرفع من احتمال الإصابة بسرطان الثدي، استئصلت الثدي بأكمله، وحل مكانه ثدي جميل -بطبيعة الحال- وبيأدي غرضه طبعًا، بس ما بينصاب بالسرطان.
ماني شجاعة متلها بس شجاعة أحكي إنه عادي الجمال بنظرتنا لأنفسنا يكون إله حدود، عادي ما نتقبل حالنا بدون ثدي.. بدون شعر.. عادي نرفض نخسر شي من حالنا، أي شي. وعادي لما أسمع جملة "أنت أجمل النساء ولو فقدت ثديك" (ما حدا حكالي ياها بالمناسبة بس قرأتها اثناء قراءتي بخصوص هالموضوع) أحس إنها أكبر كذبة سمعتها بحياتي.. طالما بتنطبق عليّ أنا بس وما بتنطبق على غيري، يعني عادي ومو عيب ما أتقبل فقدان الثدي.. او الشعر.. بس مو عادي أشوف الناس اللي اضطرت لهالخطوة إنهم بشعات/ين
لو حدا وصل لهون فأنا بشكره من قلبي، هاد رح يكون آخر شي رح أكتبه على تمبلر لحد ما أخلص جلسات العلاج اللي هم عبارة عن ٦ أسابيع مبدئيًا، أو على الأقل لحد ما أطلع بطريقة أنجو فيها من السرطان، وأحدد كيف علاقتي معه.
Please don't send me happy birthday wishes, but if you really want to, reblog this post, and go check your boobs!
Also i will post the video on it's own in another post if anyone wants to reblog but thinks that this post is too long, i know it's insane but i said I'm gonna act like me today :) (it might not be quite as effective as this post but that's alright I'll still appreciate it)