ibnmega

[ibnmega]

يردد البعض كلمات -كنت مؤمنًا بها- من عينة "لا تجبر نفسك على شيء ولا تدعهم يلوون ذراعك وخذ موقفًا". الآن، صرت أضحك عندما أسمعها، وربما أسخر منها ومن كل الشعارات الرنانة، لأنها لا تفتح سوى بيوت أخصائي التنمية البشرية وبرامج التوك شو.

الاستغناء شعور جميل، مريح، مثالي في أوقات نسعى فيها لأن نعبر الطريق في سلام. كلامٌ لطيف، لكنه رفاهية لا نمتلكها طوال الوقت. ربما لا نمتلكها أصلا.

[ibnmega]

في اللينك المرفق تحت، النسخة الأصلية من أغنية المليونيرات، كما كتبها رضا أمين ولحنها فاروق الشرنوبي، لتناسب مسرحية "المهر" الاستعراضية التي كانت تعرض عام 1989 على مسرح السلام، والممنوعة من العرض لأسباب سياسية متعلقة بإسقاطات داخل النص وكلمات الأغاني اللي اتعملت خصيصًا كلها للمسرحية، والمليونيرات منها.

وفي سنة 1992، أي بعد 3 سنوات من عرض المسرحية، اقترح يحيى الموجي على مدحت صالح إعادة توزيع الأغنية، وأقنعه إن الأغنية دي بالتحديد خسارة تتوه في الزحمة، وإن عنده فكرة مختلفة لتقديمها للجمهور.. وقد كان فعلا، علشان تنضم لألبوم "ولا تسوى دموع" وتكسر الدنيا، وتبقى واحدة من أشهر أغاني مدحت وأنجحها، وتتحول مع الوقت لأيقونة من أيقونات التسعينيات.

بالمناسبة، الصوت اللي بيرد على مدحت صالح في الأغنية بكلمة "مجنون" في النسخة الأشهر، هو يحيى الموجي مش شريف منير.. وطبعا محدش بيلاحظ ده لأنها كلمة واحدة، ولأن شريف هو بطل الفيديو كليب وحرك شفايفه معاها.

جدير بالذكر كمان إن على غلاف ألبوم "ولا تسوى دموع" مكتوب إن الأغنية ألحان يحيى الموجي، ودي أعتقد كانت غلطة لأنه فقط أعاد توزيع اللحن الأصلي بتاع فاروق الشرنوبي، وسرع التيمبو شوية.

https://youtu.be/kXJaZT2MgUc?si=OtSQMzG-Gy8GPlEZ

#مدحت صالح #المليونيرات #ولا تسوى دموع #يحيى الموجي #فاروق الشرنوبي #مسرحية المهر

[ibnmega]

أثر داوود يزيد المصري لا يزول، ولن تنقطع سيرته من الابن إلى الأحفاد، سيبقى حتى في أسمائهم وطبائعهم.

سيتزوج نجله، عبدالعظيم داوود، من سيدة تدعى فريدة هانم حسام، وينجب منها "لطفي"، الذي يرث ذكاء جده داوود، ويعجب بحفيدة نعمة المراكيبي، مطرية، المغرمة بشخصيته وأفكاره، وكأنها ورثت قلب جدتها المكتوم بحب داوود لسنوات وسنوات.

ترث «مطرية» أيضًا ظلم الأيام لهذا الحب، بعد أن يرفضه بيت عبدالعظيم باشا بسبب فارق المكانة الاجتماعية، لتنتهي بذلك قصة حب أخرى خرجت من نسل نعمة وداوود.

تتزوج «مطرية» من محمد أفندي إبراهيم، ويتناسى «لطفي» قصة حبه الأولى، ليتزوج -بعد دراسة الطب على خطى جده- من «آمال» خريجة الميردي دييه، ذات الجمال الفريد. ويخرج من رحم هذه الزيجة -التي يصفها نجيب محفوظ بأنها من أسعد الزيجات- طفلاً سيحمل اسم «داوود»، يدرس الطب أيضًا، ويتزوج من سويسرية.

فهيمة -ابنة عبدالعظيم داوود- فازت بطبع جدها الحنون، قلبه الطيب وسيرته النقية. لكنها لم تقع في الحب مرةً، وتزوجت زواجًا تقليديًا، أسفر عن طفل يحمل اسم «داوود»، يموت صغيرًا من التيفود. ورغم أن سوء بختها صار مضربًا للأمثال، إلا أن ميراث صلابة جدها بقيت آثاره في شخصها، لتتحمل وفاة بقية أولادها، الثاني بالكوليرا والثالثة بروماتيزم القلب.

في النهاية، تقرر "فهيمة" أن تسير على درب جدها داوود باشا. تعود إلى أصلها وأهلها، حيث بيت العائلة في الحارة، لتنتهي حكايتها كما انتهى، وتدفن بجواره.

أثر داوود يزيد المصري لا يزول.

(محاولة لتتبع أثر داوود يزيد المصري بعد وفاته، بعد ربط الشخصيات والأحداث ببعضها كما جاءت في رواية نجيب محفوظ)

#حديث الصباح والمساء #نجيب محفوظ #خالد النبوي #داوود يزيد المصري #داوود باشا

[ibnmega]

ألف رحمة ونور على روح عم صلاح السعدني، الممثل والراجل الجميل اللي كان شبهنا وشبه بيوتنا في كل مراحل عمره، من الشقاوة والعفرتة، لخفة الدم الشعبية اللذيذة بتاعة ولاد البلد على القهاوي أو وسط الأهل والأصحاب، للحضور والعفوية بدون افتعال أو تكلف وع الرايق، في مشوار ومسيرة كلها شقى لحد ما بقى نجم، زي الطبخة الحلوة اللي بتستوي على نار هادية، وزي أي أب خد طريقه الوظيفي من الدرجة السادسة لحد ما بقى مدير في مصنع أو شركة، وبعد المعاش أو سن معين يقرر إنه يعيش اللي باقي من عمره في هدوء تام، لنفسه ومع نفسه.. سلامات يا عمدة.

#صلاح السعدني #أرابيسك

[ibnmega]

الله يرحم حلمي بكر.. كان نفسي يشغل نفسه بالتلحين وإنتاج أعمال موسيقية ويركز في تجربته الشخصية زي ما كان شاغل نفسه بتجارب الآخرين والتنظير على الكل في كل مكان وأي زمان، على قنوات ومنصات فوق وتحت بير السلم من أجل حفنة جنيهات يسدد بيها مهر جوازة جديدة أو نفقة جوازة قديمة.. كان ملحن وموسيقي مهم، لكنه قرر إنه يكون دون كيشوت، يحارب طواحين الهواء.

#حلمي بكر

[ibnmega]

بقالي فترة حالتي النفسية مش أحسن حاجة، تايه ومنزعج من شيء ما، شيء غامض أو يمكن يكون واضح بس أنا مش شايفه، المهم إني مش مرتاح، وحاسس إني محتاج أرتب نفسي وحياتي، زي بالظبط الورق الملخبط على المكتب، واللي مع الوقت ماتعرفش هو أصلا كان بتاع إيه.. أهو أنا دلوقتي في حاجات كتير تايهه مني، وحاجات تانية مش عارف هي كانت بتاعة إيه! أو كنت بعملها إزاي!

بحاول ألاقيني، وبحاول أتصالح مع نفسي.. مع نفسي تحديدا لأني فشلت في إني أتصالح مع العالم كله.

اعتقد إني محتاج أفكر في حياتي بشكل مختلف، ومحتاج أهرب من شيء، ايه هو بالظبط بردو مش عارف، بس حاسس إني مطارد أو في حاجة مكتفاني لسه، وإني مش عارف لحد دلوقتي أخرج من أزماتي.. أزماتي اللي كنت فاكر إنها مرتبطة بمكان شغلي والناس اللي فيه، والناس اللي حوليا عموما، لكن يبدو إنها مرتبطة بحاجات أكتر من كده، يبدو إنها بقت جزء مني أنا من كتر ما تغلغلت جوايا، أو من كتر ما أنا تجاهلتها سنين طويلة فبقت حتة مني، علشان كده لازم أستئصل الحتة دي، مش عارف إزاي بس لازم أعرف.

ما علينا، المهم إني دلوقتي بكتب.. بقالي كتير مكتبتش عن نفسي ولنفسي.. يمكن ده جزء من الأشياء اللي محتاج أستعيدها.. محتاج كمان الناس تقرأها، أكتبها وأعملها (بابليك) لأي حد يشوفها ويتفاعل معاها، كأني عايز أصرخ والناس تسمع، مش مجرد صرخة في غرفة مغلقة.

المهم كمان إن صوت محمد فوزي جميل جدا، خصوصا وهو بيغني "تملي في قلبي"، ولما بيقول بالذات "لا في ماضي أقولك كان ولا فاكره ولا نسيته.. ولا مرة جمعنا مكان عشان تقرأ اللي آسيته.. بقلبي لك أنا كلي وشاغلك عني إيه قولي!" يا سلام على العذوبة والرقة يا سلام.

فوزي جميل، وكل حاجة هاتبقى جميلة إن شاء الله.

[ibnmega]

It's my 11 year anniversary on Tumblr 🥳

11 سنة من الحب لهذا المكان الجميل بأهله وناسه ❤️

#11 year tumblrversary #tumblr milestone

[ibnmega]

يبدو وصف الحب وتحليل ميكانيزم العلاقات بشكل عام، أمر مربك ومعقد لما الواحد بيقعد يتناقش فيه كفيلسوف يرتدي نظارة مقعرة، يشرب قهوته ويدخن سيجارة بلمونت، ثم يكتشف بعد سنين من المحاولة، وفي لحظة اللا شيء، إن الأمر بخفة محمد قنديل في "إن جيتنا يا جميل على عيننا جيّتك.. وإن غيبت يا جميل خليك على غيّتك"، وبساطة عبدالوهاب في "تراعيني قيراط أراعيك قيراطين.. وتشوفني بعين أشوفك باتنين"، وده ليه بقى؟ لأن "الوفا بالوفا، والصفا بالصفا، واللي بيقسى نجافيه".. ألاه! (بأداء باسم سمرة)

#محمد قنديل #محمد عبدالوهاب

[ibnmega]

صباح الخير..

من يومين، انتشر فيديو جديد من أحداث أرضنا الطيبة، عن أم فقدت ابنها اللي عنده سنة ونص، وكانت حضناه وبتبكي وتشكي وجعها اللي لخصته في جملة حزينة لا تكفيها الدموع، بتقول فيها «والله تعبت فيه، أخدت فيه 580 حقنة هيبارين».

كالعادة، وبعد تألقه في متابعة قصة «روح الروح»، سعى الصديق الصحفي أحمد مصطفى، وبذل كل جهده علشان يوصل للأم بطلة الفيديو، لعل تسمح لنا نعرف قصتها كاملة، ونساعد ولو بجزء بسيط في توثيق جرائم عدو لا يرحم، وفعلا قدر يوصلها، وحكت عن صغيرها، ورحلة صبرها معاه من يوم حملها فيه، وحتى بعد ولادته لأنه كان هزيل ومريض.

ومش بس كده، قدر كمان يخلي للحكاية بُعد تاني من منظور الأب الذي لم يظهر في الفيديو، لكن وجعه لا يقل عن وجع الأم، ويمكن اختصاره في جملة «ياريته ضل عايش وأنا اللي موت» اللي أنهى بها كلامه.

ولكي تكتمل المأساة، وتتضح الرؤية أكثر وأكثر، تواصل الزميل كمان مع خال الطفل، واللي كان شاهد على رحيله وآخر مشهد له في الحياة، في لحظة دراماتيكية كان عائدًا فيها الخال إلى المنزل، بينما الطفل بيجري عليه لاستقباله في الخارج، وإذ بالقصف يحصل على باب البيت، يسقط الطفل والخال، يرحل الأول ضعيف البنيان لأنه لم يتحمل الإصابة، وينجو الثاني مع إصابات في أنحاء متفرقة لم يلتفت إليها لأن ما في القلب أكبر وأصعب.

شكرا للصديق العزيز أحمد مصطفى على مجهوده.. وده لينك القصة للي حابب يقرأ تفاصيل أكتر.

[ibnmega]

مرة جاوبت ليا سؤال هنا اجابة سدت الفتحة اللي في مخي ..اتمنى نتقابل نحكي اكتر ..بتجاوب ع الأسئلة العقلانية بمزيج خفيف من العاطفة والأسئلة العاطفية بمزيج من العقلانية.. نفسي يكون عندي صديق زيك يقدر يفهم لما احكي عن الولد اللي بحبه وعن مشاكل الشغل والحياة وولاد الكلب اللي بيضيعو علينا حلاوتها

لو في فرصة لده هكون مبسوط.. أتمنى وقتها فعلا أكون صديق خفيف ويكون عندي ولو شيء بسيط من اللي بتدوري عليه في الصداقة

[ibnmega]

محاولات التعافي من فيديو "روح الروح" صعبة، تكاد تكون مستحيلة. أنا بقالي يوم كامل بحاول أتجاوز المشهد ومش قادر الحقيقة، وازداد الأمر سوءًا بعد ما حاولنا نتواصل النهاردة مع المصورين الفلسطينيين اللي صوروا الفيديوهات وتعاملوا مع الموقف عن قرب، وحكوا للصديق العزيز، الصحفي المجتهد، أحمد مصطفى، تفاصيل إضافية تزيد الحكاية دراما ومأساة فوق الاحتمال، تدفعك للعن العالم كله، خاصة لما عرفنا إن الشخص اللي معاها هو جدها مش والدها، ولذلك استخدم جملة "روح الروح" كتعبير مثالي يلخص علاقته بالطفلة البريئة اللي كان محتضنها وبيداعبها، كما لو كانت لسه على قيد الحياة. والأكثر من ذلك، إنه وقبل نقلها إلى مثواها الأخير، مسح جبينها بمنديل معطر، وعمل لها غُصن في شعرها، اللي بنسميها (ضفيرة) وبيسموه هناك (تجديل الشعر)، ودي عادة هناك بتتعمل في المناسبات السعيدة، لما البنت بتكون عايزه تظهر في أجمل صورة، وكأنه بيجهزها لاحتفالية أو ما شابه، ثم شالها وبدأ يلاعبها ويرفعها في الجو ويتلقفها ويبوس على خدها. هذا كله لم تنقله العدسات، لكن المصورين وشهود العيان حكوه، علشان يكون مشهد كهذا كفيل إنه يطارد الواحد لفترة لا بأس بها، في اليقظة والأحلام، دون مفر، كأني حرفيًا "أحاصر شبحًا يحاصرني"، ودون قدرة على الاختباء أو الهرب، فلا مجال حتى أن أقول للسائق "أنزلني هنا" مهما تعبت من السفر.

#روح الروح

[ibnmega]

صباح الخير اريد ان اسألك سؤال: هل تعرف قصة قصيد انا لا اشكو ففي الشكوى انحناء لكامل الشناوي؟

مساء الخير..

معرفش غير إنها كانت ممنوعة بأوامر سيادية -حسب الرواية المتداولة- لأن الجمهور اعتقد إنها بتنتقد السلطة، وبالتالي تم اتخاذ قرار بمنع الأغنية من الإذاعة.. بس أفتكر إن كامل الشناوي لم يقصد انتقاد السلطة ولا حاجة، وإنها كانت ضمن سلسلة قصائد العتاب والعذاب التي يكتبها لحبيبته نجاة الصغيرة، زي "لا تكذبي" كده، ليس إلا يعني.. وده مجرد اجتهاد شخصي مني مش معلومة مؤكدة.

[ibnmega]

أيام صعبة وتقيلة، يبدو إن مافيش مفر منها خلاص، وإن أثرها هيفضل معلم ومؤلم، كما طوبة على صدر الواحد مخلياه مش عارف يتنفس.. بس الرجاء الوحيد إن القدر لو هايمنحك فرصة تزيحها، يمنحك فرصة تانية إنك تغرسها في قلب ولاد القـ* حبة، في لحظة انتصار تداوي جزء من الهزائم المتتالية دي.

[ibnmega]

كيفك يا صاحب المخل 😊

مساء الورد يا سهام ❤️

كله حلو الحمد لله.. أتمنى تكوني بخير

[ibnmega]

شكله العنوان أتغير عشان هيك بتردش 💔

ما اتغيرش ولا حاجة.. بس ندخل البيت من بابه بقى مش من شباك الأنون علشان أعرف أرد 😂

[ibnmega]

كيف حالك.. لو حصلت على فرصة عشان تسرق وحده من دول تختار إيه تسرق ساعه حلوه من ماضيك.. ولا تسرق ساعه مع إنسان فقدته للأبد ولا تسرق يوم من أيام الطفوله 😊

كيفك يا سهام ❤️

هسرق يوم من أيام الطفولة.. أو هسرق بنك "علشان الفلوس ��قت كل حاجة" 😂

[ibnmega]

كل سنه و انت طيب و بخير يا فنان .. اثر الفن مونسني في ليالي العيد و انا بشوف نفسي في الخطوط و الالوان اللي تشبهني و بتفكرني بالمشاغب الألطف .. ممتنه للجمال و الذكرى و القصه و الفن اللي من خلالك 💙

سلامي للأثر ولصاحبته الجديدة.. تدوم الذكرى، ومش هوصيكي عليها ❤️